大牧羊仔仔出走日記: Day1-2 夢想首航-Puerto Maldonado

日期：24/3/2015-24/4/2015

行程：HK>Dallas>Lima>Puerto Maldonado

簡單而又難食嘅飛機餐，卻令我食出人間溫暖......
大佬！人地真係好耐未試過坐飛機有餐食，有毯冚啊嘛！！

差一千蚊，比你㨂坐Delta定American Airlines？纖瘦嘅P朋友話Delta座位好窄，坐得好辛苦.....就因為佢呢句，我決定比多少少錢坐AA！又有飛機餐，又有電影，又有酒水任飲......呢刻先發現我好耐無坐過咁舒服嘅airline！只係我枯寒一直都坐廉航，先係度大驚小怪啫。

雖然訓到睡眼惺忪，有得食就梗係要醒啦！

呢程飛機絕對係我人生坐得最耐嘅一次，香港出發到美國Dallas轉飛利馬好似17hrs左右，轉機去到Lima大約7hrs。總共花左24hrs坐飛機。如果計錯數唔好怪我，咁多個鐘我真係唔識數手指XD

講開Dallas轉機只有1hr走盞，者係話...如果勁多人出入境，又要自己拎行李再check in，加埋我拾下拾下去錯閘口，唔睇住班機走都偷笑。所以出發前再三問多次航空公司係咪真係得嫁？真係夠時間？之後人地回覆「係啊！真嫁！得Dallas可以咁轉機咋！你記得要check轉機洗唔洗show visa啊！」咁好啦！錢都比曬，仲唔信你咩！

嗱嗱嗱～講埋USA Visa先！我都一早申請左啦.....手續話易唔易話難唔難，就係上網填好曬資料，Print MRV Fee Payment去7仔交錢，約埋見面試官嘅時間。請定假，到時帶齊MRV Fee收據＋預約面試張紙＋公司放假信＋護照咁就得啦！過1－2星期會收到通知去順豐門市拎返護照。收到時幾擔心啊！搵黎搵去無簽證係passport入面嘅？！唔係掛～比左hkd1280嫁！幸運係....其實人地批左10年visa比我，眼大睇過隴者.....

利馬國際機場-Aeropuerto Internacional Jorge Chávez

煲劇、食同訓咁就過左10幾個鐘，輾轉去到利馬已經零晨1點。要係機場再等多7hrs，等待嘅時候，原本想買張sim咭上網，雞同鴨講之下搞左成個鐘都唔得，所以往後嘅行程都係要靠自己係hostel搵好曬路先出發！

7:35am終於可以上star peru啦！直達今次行程嘅首站Puerto Maldonado，中文翻譯為馬爾多納多港，係馬德雷德迪奧斯大區(Madre de Dios)嘅首府。位於秘魯東南邊城市，由利馬坐飛機約1hrs到達.。Puerto Maldonado同玻利維亞係接壤嘅邊境，坐巴士去玻國只要跨過Rio Madre（河）上嘅紅色橋，很快就到玻國最近嘅城鎮，我忘記阿馬遜個導遊話坐45min還是1hr30min呢？！而坐船亦可以到達邊境嘅帕爾多港(Puerto Pardo)

原來，去玻國呢條紅色橋好有來頭，係連接大西洋和太平洋並經過巴西嘅越洋公路（Interoceanica hwy），只要2hr30min就到達巴西。

上車最緊要講價！

利馬嘅天氣清爽，但到Puerto Maldonado後，馬上變成潮濕嘅熱帶氣候。初黎報到比人搵笨都預左，問乜個司機都si si si（yes咁解）不過明明講好左嘅車資，就因為我去Tarantula比埋Tambopata jungle tour尾數和訂埋去cusco嘅夜車時，要佢等左好一陣子，先再到hostel，所以司機由s/10加到s/20......哇！搶錢咩？！

Tambopata Hostel

Av.26 De Diciembre, Puerto Maldonado, Peru

+51 987 590 164

出發前係手機download左好幾個訂旅舍嘅app試用，個人覺得Booking.com幾好，介面清晰，而且由平價hostel至豪華特式酒店都有。坐左飛機咁耐應該都攰，所以首站我想安全穩陣，我經booking.com訂左間平靚正嘅dorm，只要usd11，早餐仲有炒蛋＋麵包＋咖啡或茶

放好背包，玩完紗網同鮮豔吊床，梗係即刻沖涼，洗走兩日嘅老泥，講真我無太在意水係冷係熱，因為天氣夠熱完全接受到沖凍水涼。

hostel亮點～真係好正！咩叫藝術？！
我就係咁衰，只要鐘意就真係可以愛屋及烏，食屎都覺幸福，呢度D蚊多到爆！都要坐係度寫日記，飲杯水仙，早知學下對意大利情侶坐係度打邊爐，咁咪乜蚊都無囉！

隨街可見嘅牆壁都滿有美感，我愛你秘魯Σ>―(〃°ω°〃)♡→

午飯求其入左間地道餐館，一份餐有湯，有飯，有芬達只要s/7，者係hkd17.5。

仲有個原因，令我愛秘魯再多一點......
愛狗愛貓愛動物嘅人，你會覺得佢好有愛心，但如果一整個國家嘅（大部分）人都愛惜動物，咁善良咁仁愛咁能包容不同物種，實在難得！可能陰暗面我未係呢33日睇到，但最少呢33日我見到好多流浪狗都可以隨意走或睡在大街，途人行過都會摸摸牠們後離去，就算有狗仔死都要走入銀行，保安員都唔會打鬧佢地，只會用腳不斷地輕輕攔截狗仔入內。